Мастакі Парыжскай школы. Ураджэнцы Беларусі

Цыкл дакументальных фільмаў, 2014

24 траўня 2014 года на тэлеканале “Беларусь 1” адбылася прэм’ера аўтарскага дакументальнага цыкла Алега Лукашэвіча “Мастакі Парыжскай школы. Ураджэнцы Беларусі”, знятага па замове ААТ “Белгазпрамбанк”.

У кожнай з 9 серый гэтага асветніцка-адукацыйнага праекта раскрываецца жыццё і творчасць аднаго з мастакоў Парыжскай школы: Хаіма Суціна, Марка Шагала, Льва Бакста, Надзі Хадасевіч-Лежэ, Восіпа Цадкіна, Міхаіла Кікоіна, Пінхуса Крэменя, Восіпа Любіча і Файбіша-Шрагі Царфіна.

Творчая група працавала над праектам каля двух гадоў. Аўтары фільма супрацоўнічалі са сваякамі мастакоў і непасрэднымі сведкамі падзей. Алег Лукашэвіч і Аляксандр Аляксееў сустрэліся з сынам Марка Шагала – Дэвідам Макнілам, з дачкой Восіпа Любіча – Дзінай Любіч. Гэта дазволіла не толькі атрымаць новую інфармацыю, але і ўдакладніць біяграфіі мастакоў. У цыкле прадстаўлены знаныя мастацтвазнаўцы: Марк Рэстэліні, дырэктар Парыжскай пінакатэкі; Ірына Антонава, прэзідэнт Дзяржаўнага музея выяўленчых мастацтваў імя Пушкіна; Надзін Нешавер, эксперт Парыжскай школы 1905-1939 гг. і інш. Для найбольш яркага і выразнага раскрыцця біяграфій герояў выкарыстоўваюцца пастановачныя эпізоды, у якіх задзейнічаны акцёры. Так, у ролі Марка Шагала паўстаў народны артыст Беларусі Віктар Манаеў, у ролі Міхаіла Кікоіна – заслужаны артыст Рэспублікі Беларусь Андрэй Душачкін.

У серыяле дэтальна праілюстравана творчасць мастакоў шляхам здымкі арыгіналаў карцін, дакументаў, фатаграфій. У тым ліку маштабна паказана карпаратыўная калекцыя Белгазпрамбанка, якая налічвае больш за 60 твораў мастацтва.

Першым гледачом праекта стала спявачка Мадонна. Пасля прагляду яна дала згоду на выкарыстанне сваёй музыкі ў серыяле, і з ёй была падпісана дамова. Аўтары фільма атрымалі таксама ўхваленне ад Камітэта Марка Шагала, захаваны ўсе аўтарскія правы нашчадкаў беларускіх мастакоў Парыжскай школы, з кожным праваўладальнікам заключаны кантракт.

Белтэлерадыёкампанія паказала серыял Алега Лукашэвіча на тэлеканалах “Беларусь 3” і “Беларусь 24”. У кастрычніку 2014 года ў Вільні ў межах працы выставы “Мастакі Парыжскай школы з Беларусі” адбылася першая замежная прэзентацыя цыкла. Тады ж распачалася яго трансляцыя па літоўскім тэлебачанні (на канале "LRT-kultura"). У 2015-м годзе плануецца выданне цыкла “Мастакі Парыжскай школы. Ураджэнцы Беларусі” на DVD, якія паступяць у вольны продаж.